حكايات امانى السيد 3
قعد محمود على درجات السلم الضلَمة، ساند ضهره على الحيطة الباردة، والدموع بتنزل من عينيه بحرقة لأول مرة من سنين. صوت ضحكات عياله “زياد” و”ليلى” جوه الشقة كان طالع من تحت الباب، بيخبط في قلبه زي السكاكين. كل ذكرة حلوة، كل لحظة هناء وقفت فيها جنبه، كل لقمة ناشفة اقتسموها سوا عشان يبنوا مستقبله، كانت بتمر قدام عينيه زي الشريط.
الشارع بره كان هادي، والليل عِمِق، لكن جحيم محمود كان يلا دوبه بيبدأ.
قام بالعافية، يجر رجليه زي الشيخ العجوز، ونزل للشارع. مفيش في جيبه غير الخمسين جنيه اللي باقية، ومفيش سقف ياويه. راح على القهوة البلدي اللي في أول الشارع، قعد في ركن ضلمة بعيد عن أنوار الفوانيس، وطلب كباية شاي بنعناع عشان يدفى.
القهوجي حط الكباية قدامه وبصله بشفقة واستغراب:
ـ “مالك يا أسطى محمود؟ شكل فيك حاجة مش مظبوطة النهاردة.. خير؟”
محمود هز رأسه وما نطقش، حط راسه بين إيديه وفضل ساكت.
تاني يوم الصبح، الشمس طلعت، ومعاها طلعت الفواتير اللي كانت مستنية محمود.
الساعة جات عشرة الصبح، محمود كان واقف قدام باب الورشة. المقفولة بقفل كبير من عبد الصمد. الشارع بدأ يتملي بالناس، والتجار اللي محمود كان بياخد منهم بضاعة بالآجل بدأوا يتجمعوا.
الأستاذ “جمال” تاجر الدهانات، والأستاذ “سعيد” تاجر المسامير والإكسسوارات، كانوا واقفين مع الحاج عبد الصمد قدام الباب.
أول ما شافوا محمود قرب، اتلموا حواليه زي النسور.
جمال زعق فيه:
ـ “أهلاً بالأسطى! إيه الأخبار يا عمدة؟ سمعنا إنك اتجوزت وقضيت شهر العسل في إسكندرية على حساب بضاعتنا؟ أنا ليا عندك 25 ألف جنيه حق دهانات الطلبية القديمة، والنهارده ميعاد السداد!”
سعيد كمل بغضب:
ـ “وأنا ليا 15 ألف جنيه يا محمود! والخبر جالي إن الورشة عليها حجز تحفظي من المحكمة وأنك محجوز على أصولها! هات فلوسنا فوراً يا إما هنعمل محاضر تبديد ونقفل معاك بالحساب القديم!”
محمود عرق بغزارة، وحس إن الأرض بتلف بيه:
ـ “يا جماعة استهدوا بالله.. أنا مروري بأزمة بسيطة و…”
عبد الصمد تدخل بصوته الجوهري وهو بيبص لمحمود بإزدراد:
ـ “أزمة إيه يا محمود؟ أنت مفكر الناس سُذج؟ أنت أخدت الفلوس النقدية اللي كانت في حساب الورشة، وأخدت تحويشة مرتك، ورحت تطفح بيه شهر عسل! الورشة دي دلوقتي تحت الحراسة القضائية بسبب قضية الورثة اللي رفعتها سعاد أخت المرحوم رفعت، ومفيش حبة خشب واحدة هتخرج منها إلا بـأمر المحكمة!”
