ثلاث سنين حكايات رومانى مكرم 2

الدكتور ناصر وقف مسمار مكان على السلم، الريق جف في حلقة وشفايفه بقت تترعش وهو يبص لي ومش قادر يجمع كلمة واحدة مفيدة. المسحة المزيفة بتاعة الهيبة والدكتور الكبيرة اتبخرت في ثانية.

سحبته من دراعه بهدوء مرعب ودخلت بيه جوة العيادة، زقيته للداخل وقغلت الباب بالمفتاح.

* “صُـ صلاح.. أنت بتقول إيه؟ تحليل إيه وررشة إيه؟ أنت فاهم غلط أكيد.. فيه حد ضاحك عليك!”

قاله وهو بيرجع بظهره لورا لحد ما خبط في مكتبه الخشب.

طلبت منه يقعد، وقعدت قصاده على الكرسي، طلعت الحافظة الجلد السودا من شنطتي ورميتها على المكتب بيني وبينه. فتحتها بالراحة وسحبت منها كارت الميموري، والموبايل القديم، وأهم حاجة: التقرير الطبي الأصلي بختم النسر.. والتقرير المزيف اللي هو طابعه بيده.

* “التقرير ده بختم النسر ومستشفى القاهرة الحكومي، وده تقريرك المزيف.. والرسالة اللي على الموبايل ده بتقول إنك طالب باقي الحساب من ندى يا دكتور، عشان ما تسلمنيش العينات الحقيقية. نسيت صوتك وأنت بتتصل بالفجر فاكرها هي اللي هترد عليك؟”

ناصر بص للورق، وشه بقى أصفر زي الليمونة المعتصرة، ونقط العرق بدأت تنزل من جبهته على نظارته. أيديه كانت بترتعش وهو بيحاول يمسك التقرير الأصلي عشان يشوفه، بس أنا حطيت إيدي فوق الورقة وبصيت في عينه بثبات:

* “القانون يا دكتور بيسمي دي جري\مة تزوير في أوراق رسمية، واستغلال مهنة، وشراكة في جناية تسبب في ضرر نفسي وجسدي بالغ.. يعني كارت أحمر ومش بس شطب من النقابة، ده سجن مش أقل من سبع سنين مع الشغل والنفاذ.”

ناصر وقع على الكرسي زي الج\ثة، وشبك إيديه في بعض وبيترجاني:

* “يا صلاح يا ابني ارجوك.. ندى هي اللي جاتلي، هي اللي خططت لكل حاجة! قالت لي إنها مش عايزاك وتعبانة معاك وإن فيه مشاكل كبيرة بينكم، وغرتني بالفلوس.. أنا عندي عيال وبنات في جامعات، لو الموضوع ده اتعرف بيتي يتخرب ومستقبلي يضيع!”

ابتسمت بسخرية:

* “وبيتي أنا اللي اتخرب؟ وثلاث سنين من عمري اللي ضاعوا وأنا فاكر نفسي ناقص ومش راجل؟ ودموع أمي وأبوي كل يوم وهم شايفين ابنهم مكسور الخاطر؟ دول مين يعوضهم يا حكيم؟”

ناصر بلع ريقه وصوته طالع بال بالعافية:

* “أنت.. أنت عايز إيه؟ عايزه مني إيه وأنا أعملهولك؟ أي فلوس، أي حاجة أنت تطلبها!”