حكايات صافى هانى 2
سكت للحظة وطلع تليفونه: “والصورة والرسالة اللي وصلتك إمبارح بالليل.. أنا اللي بعتهم.”
برقت بعيني: “أنت؟!”
“كنت لازم أكسر التخدير اللي كريم عاملهولك من سبع سنين، كريم كان جاي شركتي عشان يترقى ويمسك فرع في الخليج.. كان ناوي ياخد الصفقة الجديدة ويهرب بيكي برة البلد تماماً، عشان مدحت سليم بدأ يبتزه تاني بعد ما الفلوس نقصت، وكان كريم خايف إنك تكتشفي الحسابات في يوم من الأيام.”
قومت وقفت فجأة، وحسيت بقوة غريبة مبنية على نار الانتقام بتسري في كل عصب فيا، مبقتش مريم المكسورة، مبقتش الست اللي دخلت أوضة النوم زي المذنبة عشان مدير جوزها ميتكسفش من شكلها.
“عمر مدحت سليم فين دلوقتي؟” سألت بحزم قاطع.
حسام ابتسم ابتسامة باهتة مليانة وعيد: “عمر شغال دلوقتي نائب مدير في المستشفى الجديدة بتاعتهم، وكريم رايح يقابله النهاردة الساعة اتنين الظهر في فيلا مدحت سليم في الشيخ زايد عشان يسلمه شيك الابتزاز الأخير قبل ما يسافر.”
مسكت تليفوني وبصيت للساعة، كانت اتناشر ونص.
بصيت لحسام وقولتله بنبرة ثابتة زي المشرط في إيد جراح مبيغلطش: “أنا مش هسيبه يا حسام.. مش هسيبهم هما التلاتة. ليلى مش هترتاح إلا لما كل واحد شارك في بيع دمها يدفع التمن كامل.. قدام القانون وقدام الدنيا كلها.”
حسام قام ووقف جنبي، ومدلي مفتاح عربيته: “العربية جاهزة برة، وكل أوراق الق\ضية اللي فتحتها من جديد في النيابة العامة معايا في الشنطة دي.. بس في حاجة تالتة انتي لسه متعرفيهاش عن مكالمة التليفون الأخيرة بين كريم ومدحت، حاجة هتخليكي متكتفيش بس بسجنهم.”
“حاجة تالتة إيه يا حسام؟” سألته وصوتي كان طالع خشن ومتحجر كأنه طالع من صخر.
حسام مد إيده لجيب الجاكت الداخلي وطلع فلاش ميموري صغيرة سودا، وحطها في كفي وضغط على إيدي: “التسجيل ده.. مش تسجيل قديم. ده تسريب لمكالمة اتعملت من تلات أسابيع بس بين كريم ومدحت سليم، لما كريم جه يطلب منه سلفة كبيرة وقالّه إنه لو مدفعش هيفتح ملف الحادثة من تاني ويقول إن عمر اللي كان سايق.”
فتحت عيني بصدمة: “كريم هو اللي بيهدد مدحت؟!”
“كريم شيطان يا مريم،” حسام قالها بحرقة، “كريم زمان وافق على الصفقة وخد تمن دم بنته وسكت، ولما الفلوس خلصت في القمار والبورصة والديون الجديدة، رجع يبتزهم بنفس الجري\مة. ومدحت في المكالمة دي بيفكّره بحاجة إنتي لو سمعتيها ودانك مش هتصدقها.. التسجيل معايا على الموبايل هنا، اسمعي بودانك.”