مرات اخويا 3
أخويا قعد على الكرسي، وحط راسه بين إيديه.
وقال:
ـ كنت فاكر إن أكبر مشكلة بينا كانت موضوع العيال… طلع في حاجات كتير مستخبية.
نجلاء قربت منه وقالت:
ـ أنا مستعدة أصلح كل حاجة، حتى لو هياخد سنين.
لكن أخويا رد بجملة خلت الكل يسكت:
ـ إصلاح الفلوس ممكن… لكن إصلاح الثقة هو الأصعب.
وساب المكان ودخل الأوضة وقفّل الباب، ونجلاء فضلت واقفة تبكي، وعارفة إن أصعب امتحان في حياتها لسه بدأ.تاني يوم الصبح…
البيت كله كان هادي بشكل غريب.
نجلاء كانت صاحية من الفجر، وما نمتش غير ساعتين تقريبًا.
كل شوية تبص على باب الأوضة اللي أخويا قافلها على نفسه، لكنها ماكانتش تجرؤ تخبط.
أما أمي، فكانت قاعدة تدعي من قلبها:
ـ يا رب أصلح بينهم، ولا تفرق شملهم.
حوالي الساعة تسعة، أخويا خرج.
وشه كان مرهق، لكن هادي.
قال لنجلاء:
ـ البسي… هننزل.
بصتله باستغراب.
ـ هنروح فين؟
قال:
ـ عند الست صاحبة الفلوس.
من غير ولا كلمة، لبست ونزلوا.
وأنا لحقتهم، لأن أخويا طلب مني أكون معاهم.
أول ما وصلنا، الست استقبلتنا باحترام، لكنها كانت حازمة.
حطت الملف قدامنا.
بدأنا نراجع ورقة ورقة.
اتضح إن أصل الدين أقل من الرقم اللي اتقال في الأول، لكن بسبب التأخير والغرامات وصل للمبلغ الكبير.
أخويا قال:
ـ إحنا مش هننكر حقك، لكن المبلغ كبير علينا ندفعه مرة واحدة.
الست قالت:
ـ وأنا مش طالبة المستحيل… اعملوا جدول سداد واضح، وأنا هتنازل عن جزء من الغرامات.
أخويا بص لها وقال:
ـ جزاكِ الله خيرًا.
بعد ساعتين من الكلام، اتفقوا على أقساط شهرية تناسب دخلهم.
أول ما خرجنا، نجلاء فضلت ساكتة طول الطريق.
لحد ما وقفت فجأة في نص الشارع وقالت:
ـ استنى.
بصينالها.
قالت وهي بتمسح دموعها:
ـ العربية اللي معايا… هنبيعها.
أخويا استغرب.
ـ ليه؟
قالت:
ـ أنا السبب في الدين، وأنا أول واحدة لازم أضحي.
قلت:
ـ بس العربية هتسهل عليكي شغلك.
